LEGAZPI CITY-Nakatalaang maging epektibo an dagdag pamasahe sa mga pampublikong behikulo saaga, aldaw nin Lunes, Setyembre 28, kasabay kan pangapudan kan mga transport groups na Manibela asin Piston huli sa padagos na paglangkaw kan produktong petrolyo.
Basado sa mga report, na nakatalaan kuta sa Marso, alagad binago ini ni President Ferdinand Marcos Jr. sa tahaw kan kariribukan sa Middle East asin problema sa krisis sa presyo kan petrolyo.
Sa irarom kan bagong aprubadong rate kan Land Transportation Franchising and Regulatory Board (LTFRB), an minimum na pamasahe sa mga ordinaryong jeep, malangkaw nin P13 sagkod P14 sa enot na 4 kilometro asin madagdag nin P2 sa kada masunod na kilometro.
Sa mga bus na may aircondition, madugangan nin P18 an minimum na pamasahe, na may dagdag na P3 sa kada masunod na kilometro.
Mientrastanto, para sa mga provincial bus, P2 hasta P3 an dagdag sa pamasahe sa kada masunod na kilometro, depende sa klase kan bus.
Mantang an pamasahe sa UV Express madugangan nin P2.60 hasta P3 sa kada masunod na kilometro.
Pigsugo kan Department of Transportation (DOTr) sa mga operator na ipahiling an mga bagong fare matrices asin padagos na magtao nin diskwento sa mga estudyante, senior citizens asin mga Persons with disabilities.
