LEGAZPI CITY-Nagpahayag si Bise Presidente Sara Duterte na dae pa sierto an saiyang pag-atendir sa impeachment trial, kasunod kan pagsambit kan piskalya kan Kamara sa posibilidad na apodon siya bilang testigo.
Segun ki Duterte, wara pa siyang nareresibeng pagpapaapod hale sa Senate impeachment court.
An Bise Presidente nagmantenir na an impeachment sarong legal na proseso, asin pigkokonsiderar niya an pag-atubang kan saiyang mga abogado sa Senado, na iyo an saiyang sadiring pag-atubang asin partisipasyon sa mga prosisyon.
Mientrastanto, naghahanda na nin depensa an kampo ni Bise Presidente Sara enkaso ipresentar bilang hostile witness si Davao City Mayor Sebastian “Baste” Duterte sa impeachment trial.
Segun sa abogado kan depensa na si Justin Gular, naresibe na ninda an subpoena para ki Baste alagad pigtatago ninda an mga detalye kan saindang mga preparasyon sagkod na mahiling ninda an saiyang prospective testimony asin anuman na mga dokumento na pwedisir ipresentar kaini.
Kan Martes, duwang personnel gikan sa Senate Office of the Sergeant-at-Arms an personal na nagbiyahe pasiring sa Davao City nganing magserbi kan subpoena.
Si Baste pinagbotan na mag-atubang sa korte nin impeachment kan Senado poon Setyembre 28 sagkod 30 sa alas 10:00 nin aga bilang sarong testigo para sa prosekusyon kan Kamara.
Nakasurat sa subpoena na kinakaipuhan siyang magtestigo manungod sa saiyang kaaraman sa kaso nin impeachment laban ki VP Sara Duterte.
