LEGAZPI CITY-Nagsangat si Atty. Ernesto Francisco Jr. nin petisyon ngonian na aldaw sa Korte Suprema manungod sa ‘voting threshold’ kan Senate Impeachment of Court.
Segun kay Atty. Francisco Jr., ini para sa ‘petition for certiorari and prohibition’ tnganing kwestyunon an mga nagin deliberasyon kan Senado.
Pigkwestyon niya an desisyon o ‘interpretasyon’ na ginibo kan Senate Impeachment Court sa pagbabago kan ‘voting threshold for conviction’.
Mantang piglinaw kaini na bilang namamanwaan kan nacion an pagsangat kan petisyon asin pig-asegurar na warang koneksyon ini sa arin man na partido.
Nagtutubod man an abogado na an Korte Suprema sana, an igwang derichos na magpaliwanag nin sarong espesipikong interpretasyon kan mga probisyon kan Konstitusyon.
Delikado suboot an presenteng sitwasyon kun sain mga public officials o mga Senador an nagdedesisyon sa interpretasyon kan ley.
Susog digdi, hinagad kan petitioner na magpaluwas nin ‘Status Quo Ante Order’ an korte nganing makabalik sa sitwasyon bago an kontrobersiya.
Sinabi niya na an kahagadan dai kabali an pag-eksister nin sarong ‘Temporary Restraining Order’ huli ta an Hudikatura asin Lehislatura pigkokonsiderar na sarong ‘co-equal branch’.
Kun kaya, hinagad kan abogado na ideklarar na ‘null and void’ an deliberasyon kan Senado na ginibo kan Setyembre 23.
