LEGAZPI CITY- Tinuyaw kan grupo nin mga paraoma an suboot warang katotohanan na mga pahayag kan Department of Agriculture dapit sa paglangkaw kan farm gare price kan paroy sa nacion kan Agosto.
Ini an kasunod kan pahayag kan ahensya na naglangkaw an farm gate price ngani na matabangan an mga paraoma sa tahaw kan naglalangkaw na presyo kan produktong petrolyo.
Segun ki Bantay Bigas spokesperson Cathy Estavillo sa intrevista kan Bombo Radyo Legazpi, basado sa datos na kapot ninda hali sa mga nakapag ani na kan Agosto, nasa P13 hasta P15 sana an barakalan nin paroy hali sa mga paraoma.
Nanindugan an grupo na hasta sa dae nagbabakal an National Food Authority nin paroy direkta sa mga paraoma sa m akatarungan na presyo, siertong wara man na masunod na traders.
Pigigibo suboot na rason kan traders sa bagsak na presyo kan paroy an padagos na pag-uuran sa nacion, kun kaya liwat na kinalampag kan opisyal an gobierno sa kawaran nin post harvest facilities asin kawaran nin mechanical drier.
Dagdag pa ni Estavillo na padagos na nalulubog sa utang an mga paraoma urog na kun naaapektaran pa kan mga raot nin panahon an saindang produkto.
