LEGAZPI CITY-Ikakasa kan sarong transport group an 2 aldaw na nationwide transport strike sa maabot na Setyembre 29-30 ngani ni ipangapudan an padagos na paglangkaw kan produktong petrolyo sa nacion.
Segun ki PISTON National President Mody Floranda, sa intrevista kan Bombo Radyo Legazpi, na isasagibo ini poon Setyembre 29 sagkod 30, kun sain padagos na pangapudan an kadifisilan kan hanay kan transportasyon, asin kan mga namamanwaan, mantang kaakibat kaini an paglangkaw man kan presyo kan mga babarakalon.
Huli suboot sa isyu kan paglangkaw kan presyo kan langis, dakulang ganansya an nawawara sa sektor kan transportasyon, na haros P1,500 an napapaduman sana sa dagdag na gastos, mantang dai pa kaiba digdi an buwis sa produktong petrolyo.
Nasa P17 kada litro man an dagdag buwis sa langis, kaya haros P600 an nawawarang ganansya sa mga driver na dapat para sa mga pangangaipo kan saindang mga pamilya.
Kun padagos an dagdag sa presyo, dakula man an nawawarang ganansya para sa sektor kan transportasyon.
Pinaka-katuyuhan kan lakdang na ini an haloy nang pangapudan na ibasura an oil deregulation law, pagtanggal sa excise tax sa langis, siring man an Value Added Tax o VAT.
