Warang nairehistrong Pilipinong naapektaran sa nangyaring pagsabog sa Riyadh, Saudi Arabia makalihis maglansar nin missile attack an Yemeni militant group na Houthi sa kabisera kan nakalihis na semana.
Segun sa Department of Migrant Workers (DMW), padagos na pigbabantayan an sitwasyon kan poco mas o menos 700,000 Pilipinong presenteng nagtetenir asin nagtatrabaho sa Saudi Arabia, katabang an Philippine Embassy asin mga konsulado sa lugar.
Inihayag kan ahensya na preparado an mga diplomatikong tanggapan kan Pilipinas na magpaabot nin tabang sa siisay man na Overseas Filipino Worker (OFW) na nangangaipo nin tabang sa tahaw kan tensyon.
Kasabay kaini, nakiolay asin nagpagirumdom an DMW sa mga Pilipino sa Saudi Arabia na magtenir na mapagmatyag asin sunudon an mga abiso asin safety guidelines na ipigpapaotob kan mga otoridad.
Inako kan grupong Houthi na tinarget kaini an mga sensitibong pasilidad sa Riyadh gamit an missile asin drone, mantang pormal na pigkokondena kan United Nations Security Council an padagos na pag-atake kan grupo na nagkakawsa nin peligro sa mga sibilyan asin energy infrastructure kan nacion.
