LEGAZPI CITY-Nag-abot na sa 378 na nairehistrong kaso kan Dengue sa ciudad kan Legazpi, mantang nasa 5 an nairekord na fatality, susog sa Legazpi City Health Office.
Segun ki Legazpi City Health Officer Dr. Francis Gomez, sa intrevista kan Bombo Radyo Legazpi na mas doble ini kumparar kan nakalihis na peryodo kan taong 2025.
Pinakahalangkaw na kaso an nairehistro sa Legazpi kabale asin nakakabahala ini huli ta haros labi 100 % an dinagdag kan kado kumparar kan nakaaging taon.
Basado sa huring datos nasa lima na an mortality sa ciudad asin napag-araman sa inspeksyon na positibo an mga harong kaini na igwang breeding nin lamok.
Nasa edad 3 hasta 6-taon an tulo digdi asin saro an adult sa mga nairekord na fatality.
Paliwanag ni Gomez, na an Dengue an pig-aapod na “vector borne disease” asin an transmission kaini sa tawo nakukua sa kagat kan insekto o hayop, partikularmente kan lamok.
Dagdag pa kan opisyal na kadaklan kaini nagbubunay sa mga “stagnant” na tubig kaya importanteng mapuksa an mga breeding sites kaini.
Kaipuhan suboot an kooperasyon kan kada household sa paagi kan pag-praktis kan 4 o’clock habit kun sain magtatagama nin sampulong minutos sa paglilinig ngani mawara an posibleng mga breeding sites kan lamok orog na sa mga igwang naiipon na tubig.
Siring kan mga flower vase, drain kan platuhan o airconditioners, mga bote asin mga rida sa palibot kan mga harong.
Sa presente, nagkakaigwa nin partnerships asin kolaborasyon sa mga LGU offices, OCENR, task force kalinigan, mga barangay, siring man sa mga Sangguniang Kabata, CDRRMO asin Deped.
Padagos an saindang monitoring asin pagkondusir nin fogging activity sa mga komunidad ngani mapapaba an kaso kan Dengue.
