LEGAZPI CITY-Nangapudan an mga grupo nin mga obrero sa Pasig asin Navotas Regional Trial Courts (RTCs) na ibasura na an petisyon na naghahagad na ulangan an implementasyon kan P85 minimum wage increase sa Metro Manila.
Segun kay Nagkaisa chairperson asin president kan Federation of Free Workers (FFW) na si Sonny Matula, na “an kagitingan dai nasusukol sa larangan nin ralabanan, posibleng makua man ini sa sadiring korte—sa kusog nin boot na midbidon asin itanos an sala, urog na kun narealisar kan korte na wara ining hurisdiksyon.”
Ipigsugo kan Korte Suprema sa Readycon Trading and Construction Corporation, R-II Builders Inc., asin sa Alliance of Philippine Fishing Federations Inc. na magkomento sa laog nin 10 aldaw sa sarong petisyon na naghahagad na halion na an mga orden kan Pasig RTC na nag-uulang sa implementasyon kan P85 minimum wage increase sa Metro Manila.
Ini an nagmando sa Regional Tripartite Wages and Productivity Board of the National Capital Region (RTWPB-NCR) asin sa National Wages and Productivity Commission (NWPC) na magsumiter kan saindang mga komento.
An petisyon isinangat kan Kampihan ng Maralita sa Manggagawa (KAMANGGAGAWA) Party-list asin iba pang petisyonaryo.
Marurumduman na kan Hulyo, nagpaluwas nin temporary restraining order an Pasig RTC kontra sa implementasyon kan paglangkaw kan sahod.
Huli digdi, sinabi kan mga grupo na an Labor Code nagbugtak na nin sarong espesipikong proseso para sa pag-angat kan regional wage orders, asin an prosesong ini dapat na sunudon an kagabsan.
Dugang pa ninda na bako balido an anumang mga desisyon na ipinaluwas na warang tamang hurisdiksyon.
