LEGAZPI CITY-Nagpaluwas nin traffic and safety advisory an NLEX Corporation para sa gabos na motorista na nagbibiyahe sa North Luzon Expressway (NLEX) asin Subic-Clark-Tarlac Expressway (SCTEX) sa tahaw kan nagpapadagos na makusog na pag-uran na dara kan Southwest Monsoon o Habagat.
Sa sarong public notice, nagpagirumdom an pamunuan kan NLEX sa mga drayber na mag-ingat mantang nagmamaneho nin huli sa mahalnas na tinampo asin hababang visibility sa highway.
Inaabisuhan an gabos na magbawas nin rikas, magmantenir nin ligtas na distansya sa pagpreno sa ibang mga lunadan, asin buksan an saindang mga ilaw sa enotan enkaso magkaigwa nin maraot na panahon.
Pigsierto man kan kumpanya na an mga patrol crew, Incident Response Teams, asin towing equipment, naka-standby sa mga estratehikong lugar para tulos na magresponde sa anuman na emerhensya o magin sa mga baradong tinampo.
Mientras tanto, itinaas man kan National Disaster Risk Reduction and Management Council (NDRRMC) an national status for disaster response sa Red Alert.
Basado sa abiso asin report kan NDRRMC, padagos an koordinasyon ninda sa mga lokal na gobierno asin emergency response agencies para sa evacuation asin relief distribution sa mga lugar na labing apektado kan pagbaha asin pag-uran sa rehiyon.
