LEGAZPI CITY-Liwat na inungkat an promesa kan Pilipinas na hahaleon an BRP Sierra Madre na stranded sa Ayungin Shoal sa West Philippine Sea.
Ini makalihis na sabihon kan deputy spokesperson kan embahada kan China na si Guo Wei na nanuga suboot an Pilipinas na hahaleon an barko sa lugar.
Alagad, kinontra ini kan Armed Forces of the Philippines (AFP) asin nanindugan na dai babayaan an barko. Segun sa tagapagtaram kan AFP para sa West Philippine Sea retired Rear Admiral Roy Vincent Trinidad, an pahayag kan embahada kan China, sarong pagprobar na mabago an historya manungod sa presensya kan BRP Sierra Madre sa Ayungin Shoal.
Sinabi niya na an Chinese Communist Party (CCP), iyo an pinakaenot na ilegal na nagsakop kan Panganiban Reef (Mischief Reef) kan taon 1995, na nasa laog kan exclusive economic zone (EEZ) kan Pilipinas.
Sinabi ni Trinidad na nakarekord na an Chinese Foreign Ministry nagsierto sa Pilipinas asin sa internasyunal na komunidad na an mga saradit asin octagonal wooden structures na itinatag sa Panganiban Reef an pawang “shelters” o sirungan sana para sa mga lokal na parasisira asin nagpromisa an China na an mga temporamenteng istruktura na ini warang military purpose.
Alagad, an mga “shelters” na ini nagin nang sarong base militar na may 3,000-metros na runway, mga emplacement nin missile, mga radar drone asin mga naval berths.
Sa huri, tinawan-duon kan admiral na an presensya kan BRP Sierra Madre sa Ayungin, an lehitimo asin sarong permanenteng sovereign deployment sa shoal kun saen an nasyon igwa nin sovereign rights asin hurisdiksiyon sa nacion.
