LEGAZPI CITY-Posibleng mag-atubang nin nin permanenteng pagbabawal sa posisyon sa serbisyong pampubliko an mga opisyales kan gobierno na mapapatunayan na nag-incite sa ibang tawo nin perjury, segun ki Sen. Panfilo “Ping” Lacson.
Sinabi pa ni Lacson na pwedisir ikonsidera bilang principal sa krimen an sarong tawo na direktang nag-incite sa kapwa na magkomiter nin perjury, basado sa probisyon kan Revised Penal Code (RPC) madapit sa conspiracy asin mga principal sa krimen.
Pigtutukdo kan senador an nakasurat sa Article 8 kan RPC, kun saen nagsasabi na igwa nin conspiracy kun an duwa o labi pang tawo nagkakaoroyon na magkomiter nin krimen asin nagdedesisyon na isagibo ini.
Mientras tanto, sa Artikulo 17, an mga ibinibilang na principal kabali an mga “direktang nagpipirit o nag-aakit sa iba na gibohon” an krimen.
Kasunod kaini, pig-asegurar ni Lacson na si Sen. Rodante Marcoleta asin si dating Rep. Michael Defensor manungod sa suboot “coached” na testimonya ni dating Marine Orly Guteza.
Sinabi niya na basado sa record kan Senate Blue Ribbon Committee, mahihiling na si Marcoleta suboot an naggiya ki Guteza kun ano an dapat niyang sabihon sa saiyang affidavit durante kan committee hearing kan Setyembre 2025.
Kan huri, binawi ni Guteza an saiyang enot na pahayag asin inakusaran si Marcoleta asin Defensor na pig-engganyar siya na magtestigo karibay nin kwarta asin scholarship para sa saiyang mga aki. An mga pahayag na ini mga alegasyon na kaipuhan na patunayan sa paagi nin maninigong proseso.
Sinabi pa ni Lacson na an Department of Justice (DOJ) asin an Office of the Ombudsman pwedisir kabale sa posibleng magsangat nin reklamo, huli ta an perjury sarong public offense.
Apwera sa posibilidad na sangatan nin kasong kriminal, sinabi man ni Lacson na plano niyang magsangat nin bill ngani na dagdagan an penalidad asin multa sa subornation of perjury.
Ini may katuyuhan na mas mapadusahan an mga naggagamit kan saindang posisyon o impluwensya ngani sutsutan an iba na mag-utik sa irarom kan saindang sinumpaang mga saysay.
Mientrastanto, nakadepende man liwat sa imbestigasyon asin due process kun igwa nin supisyenteng basehan ngani magsangat nin kaso kontra sa sisay man na konektado sa alegasyon nin subornation of perjury.
