LEGAZPI CITY-Preparado an Department of Education Albay, sa pagkondusir nin active shooting asin active attack drill sa Agosto 25, na enot nang isasagibo sa San Fernando National High School, Sto. Domingo, Albay.
Segun kay Schools Division of Albay Spokesperson Froilan Tena, sa intrevista kan Bombo Radyo Legazpi, nagsagibo naman nin kaparehong drill kan Agosto 20 sa nagkapirang eskwelahan partikular sa Pantao National High School.
Isasagibo ini basado sa ipinaluwas na memorandum kan DepEd division asin national office kun sain pig-eenganyar an mga eskwelahan na magkondusir nin active shooting asin active attack drill bilang safety measure sa tahaw kan mga nangyayari sa eskwelahan sa nacion.
Madurar suboot ini nin sarong oras asin isasagibo an manlain-lain na shooting o active attack drill ngani magin preparado an mga aki asin mga paratukdo.
Enkaso suboot dai makasabay an ibang eskwelahan, tinutugutan man ini na magpili nin petsa as soon as possible para sa isasagibong drill.
Katuwang man sa lakdang an PNP, BFP, asin iba pa sa pangenot kan Department of Education.
Sa tahaw kaini, magkakaigwa nin sarong lugar an mga aki, mga paratukdo, asin magurang para sa sarong reunification kun sain sinda maghihilingan.
Ma-ookupar man suboot kan isasagibong drill an luwas kan mga eskwelahan.
Mientras tanto, nagdagdag naman nin mga CCTV sa nagkapirang darakulang eskwelahan sa rehiyon.
