LEGAZPI CITY-Biglang naglangkaw an sulfur dioxide o SO2 emission kan Bulkang Mayon, na pwedesir magin sinyales kan posibleng pagbalik kan aktibidad kan bulkan, segun sa Philippine Institute of Volcanology and Seismology (PHIVOLCS).
An SO2 emissions kan Mayon uminabot sa 8,393 tonelada kada aldaw kan Lunes, Agosto 17.
Ini an pinakahalangkaw na nairehistro poon kan magbaba an konsentrasyon kan volcanic gas sa Mayon kan Hulyo 16.
Poon kan ibaba an status kan Mayon sa Alert Level 2 kan Agosto 5, nag-average na sana nin 2,532 na tonelada an SO2 emissions kaini kada aldaw.
Narisa man kan PHIVOLCS an halipot na flare o paglangkaw kan pressure hali sa bulkan.
Mantang nagtetenir sa background level an volcanic seismicity asin real-time seismic energy release, segun sa mga volcanologist na posibleng magpatanid ini kan halangkaw na SO2 emission sa posibilidad kan panibagong eruptive activity.
Kun igwa pang saro pang pagtuga, pwedisir magkaigwa nin peligrosong pyroclastic density currents o uson, rockfall, ballistic fragments asin lakop na ashfall.
Sa ngonian nagtetenir sa Alert Level 2 o katamtaman na lebel kan unrest an Bulkang Mayon.
Huli digdi mahigot na inaabisuhan an publiko na ibitaran an paglaog sa 6-kilometer na Permanent Danger Zone (PDZ) kan bulkan.
