LEGAZPI CITY—Arestado an duwang indibidwal sa magkahiwalay na drug interdiction operations sa Matnog port sa provincia kan Sorsogon.
Segun ki Matnog Municipal Police Station Chief of Police Police Major Wilfred Lloyd Berdin, sa intrevista kan Bombo Radyo Legazpi, binisto an saro sa mga suspek na sarong 61-anyos asin residente kan Dasmarinas, Cavite.
Durante kan pag-inspeksyon sa mga kagamitan, nahulog suboot an plastic sachet sa paril asin digdi nagkaigwa nin pagsuspetsar an nag-operate kan screening.
Huli kaini sinugo an suspek na ipahiling an laog kan bulsa asin nadukayan an transparent plastic sachet na may laog nin pigtutubudang shabu.
Nakumpiskar digdi an nasa duwang gramos nin pigtutubudang shabu na may estimated standard value na P13,600 asin sa presente nasa irarom na kan inquest proceedings.
Afuera digdi, naarestar pa an sarong 20-anyos na suspek na taga-Western Samar sa ginibong inspeksyon makalihis madiksubre an pigtutubudang marijuana.
Nakumpiskar digdi an marijuana kush na may gabat na nasa 2 gramos asin kantidad na P2,360.
Sa presente, na-inquest na an nasabing suspek.
Mientrastanto, pagiromdom man kan hepe sa mga nagbabiyahe asin na-aagi sa pantalan na dae na magporbar na magpuslit nin mga ilegal na kontrabando huli sa sierto suboot na madadakop sinda kan mga otoridad.
