LEGAZPI CITY-Pigsierto kan lokal na gobierno kan Maynila an pagigin handai kaini sa pagbabarewas nin bulong kontra sa mga helang na nakukua sa pagbabaha kasabay kan pirang aldaw na paguuran sa ciudad.
Ipighayag ini ni Manila Mayor Francisco ‘Isko’ Moreno Domagoso na handa an ciudad na magpaabot nin 165,000 capsule nin bulong na magagamit suboot bilang proteksyon kontra leptospirosis.
Segun sa alkalde, ‘abilable’ an bulong sa mga health centers kan manlain-lain na distrito sa ciudad kan Maynila para sa sisay man na nangangaipo.
Paliwanag ni Mayor Isko Moreno na an lakbang na ini resulta kan mga naeksperyensyahan kaito kaya naghanda suboot sinda nin rinibong bulong bilang dagdag proteksyon orog na sa mga naglulusong sa baha.
Katakod pa kaini, pigbisto man kan alkalde an pagsunod sa direktibang paglilinig o de-clogging drive kada semana, pangongolekta kan basura sa ciudad asin sa marikas na pagtugon sa evacuation.
Nagtutubod si Moreno na an mga ini nakatabang ngani mabawasan an epekto kan pirang aldaw na haros warang patod na pag-uuran sa ciudad huli sa epekto kan habagat.
