LEGAZPI CITY-Nagpadara an Pilipinas nin 40 portable power generator ngani tabangan an mga komunidad na apektado kan padagos na pag’atake sa imprastraktura nin enerhiya kan Ukraine.
An mga Daiden generator, na an lambang saro may kapasidad na 6 kilowatts, uminabot na sa sarong hub kan Ministry of Energy of Ukraine kan Agosto 12.
Gagamiton ini para sa mga sibilyan na may katuyuhan, kabali an backup na kuryente para sa mga pasilidad na kritikal sa mga komunidad.
Nagpoon an humanitarian initiative pagkatapos kan sarong pagtiripon kan Pebrero sa pag-ultanan nina Ukrainian Ambassador Yuliia Fediv asin Senador Erwin Tulfo, na nagtabang sa pag-abante kan proyekto.
An mga generator idinonar kan Highball Traders Inc. asin ipinadara sinda hale sa Pilipinas pasiring sa Port of Gdansk sa Poland bago ipinadara sa Ukraine, sa paagi kan resCUE Donations Scheme kan European Union Civil Protection Mechanism, sa suporta kan Poland’s Governmental Strategic Reserves Agency.
An mga generator piglalaoman na makakatabang na mamantenir an suplay nin kuryente sa mga kritikal na pasilidad asin mapakusog an kakayahan kan mga komunidad na ipadagos an saindang mga importanteng serbisyo sa tahaw kan mga pag’atake sa imprastraktura nin enerhiya kan Ukraine.
