LEGAZPI CITY-Mapoon na sa Agosto 14 an enot na hearing kan Truth Commission na pigbilog ngani madokumento an mga suboot extrajudicial killings (EJKS) na konektado sa war on drugs kan administrasyon Duterte.
Ini an kinumpirma kan pamayo kan komisyon na si Atty. Raul Pangalangan. Sinabi niya na gigibohon an hearing sa Pope Pius Center sa Manila.
Saro sa mga kaso na pag-oolayan sa initial proceedings, iyo an manungod sa 19-anyos na si Raymart Siapo na taga-Navotas, na ginadan kan 2017 makalihis na akusaran na nagpapabakal suboot nin marijuana.
Segun ki Pangalangan, nagkaigwa na nin exhumation o pagkalot kan bangkay ni Siapo, asin pig-examine kan forensic pathologist na si Dr. Rquel Fortun. Kaya piglalaoman na maipresentar sa hearing an findings sa pagkagadan ni kaini.
Magigirumduman na nabilog an komisyon na igwang limang miyembro kasunod kan pangapodan ni Cardinal Virgilio David kan Nobyembre kan nakalihis na taon. Inorganisar ini kan Simbahan Katoliko asin mga organisasyon sa civil society , na wara prosecutorial o judicial powers.
Alagad, segun ki Pangalangan, na nagsirbe bilang dating huwes kan International Criminal Court (ICC), pwedisir magdangog an komisyon sa mga kaso na nasa luwas kan hurisdiksyon kan internasyunal na tribunal.
An mayor na obheto kan komisyon iyo na madangog an lado kan mga biktima, madokumento an saindang mga eksperyensya asin iiba an impormasyon sa sarong pormal na report.
Dagdag pa ni Pangalangan, pwedisir itao kan komisyon an mga ebidensiya asin findings na natipon kaini sa mga ahensya kan gobierno siring man sa mga internasyunal na human rights organization para sa posibleng aksyon.
Bukas an komisyon sa pagdangog sa gabos na lado kabali na an mga opisyales kan gobierno asin mga indibidwal na pwedisir magtao nin impormasyon.
