LEGAZPI CITY—Timbog an sarong persona sa ginibong gun buy-bust operation kan mga otoridad sa Barangay Kinale, Polangui, Albay.
Binisto an suspek na si alyas “Rio”, 38-anyos, laborer asin residente kan nasabing lugar.
Naarestar ini makalihis na makipagtransaksyon sa sarong poseur-buyer kun san pigpabakal kaini an sarong (1) kalibre .38 na revolver (warang serial number asin trademark) na kargado nin duwang live ammunition, kaiba an apat na kadugangang bala nin cal. .38 karibay nin buy-bust money.
Nakua man sa posisyon kan suspek an walong pidaso nin heat-sealed transparent plastic sachets na may laog nin pigtutubudang shabu na may gabat na 3.2 gramo asin estimated street value na P21,760.
Ginibo an operasyon kan Polangui Municipal Police Station, Albay Provincial Intelligence Unit, 505th Maneuver Company-Regional Mobile Force Battalion 5, asin 1st Albay Provincial Mobile Force Company.
Mientrastanto, ipighanda na kan Polangui MPS an magkakanigong dokumento para sa pagsunad nin angkop na kasong kriminal laban sa suspek.
