LEGAZPI CITY-Pigsierto ni Presidente Ferdinand Marcos Jr., na padagos na tutukan kan gobierno an salud, pagkakan, asin karahayan kan mga Pilipino, orog na kan mga jovenes.
Sa saiyang vlog, pigpaliwanag ni Marcos kun pano niya pigpreparar an saiyang ika-limang State of the Nation Address (SONA).
Sinabi niya na siya mismo an nagsurat kan enot asin huring parte kan diskurso, mantang nakipagtabangan siya sa sarong grupo sa pagkompuesto asin pagsiyasat kan mga natatadang parte.
Segun sa Presidente, nagpreparar sinda kan SONA sa laog nin nagkapirang semana asin padagos siyang nagsanay kan saiyang pagtaram sagkod sa mismong aldaw na siya nag-atubang sa Kongreso.
Napag-olayan man digdi an mga surat hale sa mga jovenes na naghahagad nin orog na suporta para sa salud asin paglaban sa gutom, bisyo, asin iba pang problema.
Sinabi ni Marcos na kabali sa mga programa kan gobierno an ‘Walang Gutom Program’, ‘school feeding program’, suporta sa dialysis patients, asin iba pang serbisyo sa salud.
Tinawan-duon kaini an zero balance billing sa DOH hospital wards asin iba pang asistensya para sa mga pasyenteng nangangaipo nin bulong asin pang-ospital.
Segun ki Marcos, importante para sa mga Pilipino na magin maray an salud asin magkaigwa nin supisyenteng pagkakan para magkaigwa nin marhay na buhay asin futuro.
