LEGAZPI CITY-Sinabi kan suboot apat na dating bodyguards ni dating Ako Bicol party-list Rep. Elizaldy “Zaldy” Co na nabilog an ”18 Maleta boys” ngani mang-blackmail asin mangikil laban sa nagkaporang pulitiko asin haralanglaw na opisyal katakod kan pagdedeliver nin male-maletang kwarta.
Marurumdumang binawi kan apat sa 18 miyembro kan dating bodyguard ni Co an saindang mga naenot na akusasyon kina President Ferdinand Marcos Jr., Leyte Rep. Martin Romualdez, asin Co makalihis suboot nindang maaraman na an obheto kan saindang grupo iyo an ”mang-blackmail asin extortion” laban sa nagkapirang bistong personalidad.
Sa saindang bagong sinumpaang salaysay sinabi kaini na mantang naghahaloy, pabago-bago na suboot an mga pangaran kan mga mga personalidad na idinadawit sa mga alegasyon.
Sinabi kan sarong dating bodyguard na obhetong paluwason suboot an mga nakakaresibe nin kwarta kay Co an mga personalidad na kanilang idinawit.
Inakusaran man ninda an saindang abogado na si Atty. Levito Baligod na nagpromesa suboot kan saindang dakulang kantidad nin kwarta kun magtatagumpay an saindang sinasabing plano.
Tinaggi man ni Baligod an mga paratang asin sinabing warang katotoohan an alegasyong may pangingikil laban sa mga pulitiko.
Mientras tanto, nanindugan si George Villalon, saro sa mga dating bodyguard na dai nag-atras kan saitang salaysay, na totoo an saindang mga naenot na alegasyon.
Sinabi kaini na an apat na testigong nagbawi kan saindang mga affidavit, inalok suboot nin P20 million – P25 million kada saro kapalit kan pagbawi kan saindang mga testimonya.
