LEGAZPI CITY- Tinawan linaw kan grupong Manibela na ibang grupo an nag-anunsyar nin kanselasyon kan ikakasa kuta na tigil-pasada sa Metro Manila.
Segun ki Manibela Chairman Mar Valbuena sa intrevista kan Bombo Radyo Legazpi warang kinaaraman sa saindang grupo an mga nagkanselar kan nasabing transport strike.
Tinawan duon kaini na ipagpapadagos kan saindang grupo an ikakasang tulong aldaw na tigil-pasada sa masunod na semana.
Paliwanag kan opisyal na magkakaigwa pa nin pinal na pag-oolay an saindang grupo.
Sinabi ni Valbuena na bukas sinda sa mga asistensya na ipig promesa kan gobierno kaibanan na an P12 fuel subsidy.
Alagad padagos na ipigbubusol kan grupo an saindang pangapudan na langkawan an pamasahe ngani na magkaigwa man nin ganansya an mga drivers sa tahaw kan presenteng krisis na nagresulta sa halangkaw na presyo kan langis.
