LEGAZPI CITY-Ipighayag ni Department of Education (DepEd) Secretary Sonny Angara na target kan ahensya na masolusyunan an mga classroom deficits sa ngonian na taon.
Segun sa kalihim sa isinagibong press conference, nasa 130, 000 classroom deficits sa kabilugan an nacion asin naisagibo na sa irarom kan presenteng administrasyong Marcos an nasa 21,000 classrooms kairiba an mga local government units.
Pinaglalaoman suboot na madagdagan pa ini sa paagi kan nakalihis na Public Private Partnerships (PPP’s) sa irarom kan nakaaging administrasyon kun sain igwang nasa 14,000 classrooms asin 16,000 classrooms naman hale sa ikaduwang tranch kan presenteng administrasyon.
Target ninda an sumatotal na 50, 000 classrooms na pinaglalaoman na mapuunan ngonian na taon.
Alagad dakulang angat sana suboot orog na sa mga ciudad, an pagpapatugdok kaini huli sa kawaran nin espasyo sa mga buildings.
Mientras tanto, mensahe kan kalihim na dai dapat ma-overwhelm sa kadakol na programa huli ta kinakaipuhan suboot habulon kan ahensya an mga nabanggit na kakulangan sa mga classrooms.
