LEGAZPI CITY-Uminabot sa P240,000 an danyos sa nangyaring kasulo sa sarong uncestral house sa Brgy. Gogon Centro, Virac Catanduanes kan Agosto 4.
Basado sa datos kan Bureau of Fire Protection Virac, nagdoble an numero kan mga insidente nin kasulo sa nasabing lugar kumparar kan nakaaging taon.
Segun kay Virac Fire Station Chief Operation Senior Fire Officer 1 Nick Anthony Llarena, sa intrevista kan Bombo Radyo Legazpi na tulos nag-dispatch nin mga fire truck sa lugar asin naapula ini bandang alas 10:35 na.
Nagkondusir man sinda nin inisyal na imbestigasyon asin napag-araman na an residential building sarong uncestral houose asin igwang duwang pamilya an nag-ookupar digdi.
Mantang gibo sa concrete walling an nasabing harong, puro kahoy suboot an nasa laog kaini kaiba na an flooring sa ikaduwang palapag, kaya marikas na nagkalat an kasulo.
Wara man nin nadamay na harong sa insidente asin tulos man na naabishuan kan katulong an mga occupant sa second floor kaini.
‘Totally burned’ man an harong asin uminabot sa 240,000 an kabilugang danyos basado sa inisyal na assessment kan BFP.
Mientras tanto, sinabi kan opisyal na naglangkaw an kaso kan kasulo sa Virac, kun sain kumparar sa 8 insident kan nakalihis na taon, nasa 16-17 na insidente na nin kasulo an nairehistro ngonian na taon sa saindang lugar.
Pagirumdom kan opisyal sa mga residentes na halion an mga nakasaksak na appliances enkaso maluwas sa saindang harong, asin dai pagbayaan an mga tig luluto orog na kun an gamit kahoy, huli ta saro suboot ini sa mga nagkakawsa nin kasulo.
