Tinawan duon kan kampo ni Vice President Sara Duterte na warang conflict of interest sa naging meeting kan mga opisyal kan Office of the Vice President (OVP) asin Commission on Audit (COA) katakod kan audit sa confidential funds.
Sa sarong pulong balitaan kan Miyerkules, sinabi ni defense spokesperson Atty. Michael Poa na obheto sana kan meeting na linawon an mga naga-iran na audit guidelines.
Segun ki Poa, natukar na an isyu sa Senate impeachment court asin mismong si Presiding Officer Sen. Francis “Chiz” Escudero na an nagtaram na warang conflict of interest sa nasabing isyu.
Marurumduman na enot nangkinuwestyon ni senator-judge Raffy Tulfo an partisipasyon ni Poa sa defense panel makalihis tumestigo si dating state auditor Atty. Roderick Wamil na kaibanan an abogado sa mga opisyal kan OVP asin Department of Education (DepEd) na na naghagad na magluwas nin audit query imbes na Audit Observation Memorandum (AOM) kung igwang nahiling na isyu an COA sa paggamit kan confidential funds.
Paliwanag ni Poa na naghagad siya nin tsansa na magtaram sa impeachment proceedings ngani na maitama an konteksto kan nasabing meeting, urog pang pinag-olayan ini sa pagdangog asin sa social media.
Dugang pa kaini na mismong si Wamil na an nagtaram na komon sana para sa mga ahensya de gobierno na makipag-meeting sa COA ngani na maghagad paglilinaw sa mga patakaran sa pago-audit.
Sinabi man ni dating COA Intelligence and Confidential Funds Audit Office na maging ang iba pang ahensya kan gobierno an nakikipag-meeting man sa COA para sa mga orolay na may kinaaraman sa audit.
Segun pa ki Poa na an nasabing meeting an may kinaaraman sana sa Internal Control and Fraud Audit Office (ICFAO) kan COA asin inimbitaran siyang mag-atendir huli ta siya an officer-in-charge for finance kan OVP kan nasabing panahon.
