LEGAZPI CITY- Dinakop kan mga otoridad an duwang Senior High School students huli sa pinagsususpetsaran na pagdadara nin marijuana sa laog kan sarong pampublikong eskwelahan sa Daraga, Albay.
Basado sa impormasyon gikan sa Daraga Municipal Police Station, nagsasagibo nin routine inspection an mga security personnel kan eskwelahan kan mahiling sa sarong estudyantean improvised “tooter” na may laog nin pinagtutubudan dahon nin marijuana na itinao sa saro pang estudyante.
Huli digdi, tulos na ipinaabot an impormasyon sa mga kapulisan.
Itinurn over kan mga opisyal kan eskwelahan an duwang estudyante sa mga otoridad, kun sain na-recover an duwang improvised tooter na may laog nin suspected marijuana na may standard drug price na P600.
An estudyante na nasa legal na edad an masairarom sa proseso kan ley mantang an menor de edad o an Child in Conflict with the Law an tulos man na nai-turn over sa Daraga Municipal Social Welfare and Development Office para sa magkakanigong interbensyon.
