LEGAZPI CITY-Nagkasundo an House Prosecution asin Defense Panel para sa stipulation kan nagkapirang “common exhibits” sa pagpapadagos kan pagdangog sa misuse of confidential funds charges laban kay Vice President Sara Duterte ngonian na aldaw nin Lunes, Agosto 3.
An stipulation of common exhibits, iyo an sarong kasunduan kan magkabilang kampo sa korte an tanggapon an mga parehong ebidensya nin dai na kaipuhang patunayan pa kun totoo an mga ini.
Enot nang pighagad ni House Prosecution counsel Atty. Lorna Kapunan sa Senate Impeachment Court an pag-stipulate sa common exhibits sa pagitan ninda kan depensa. Naghagad man nin limang minutong suspensiyon sa pagdangog si Defense counsel Atty. Michael Poa ngani mapag-adalan an kahagadan kan prosekusyon.
Nagpahayag man nin pagsang-ayon an defense panel ni Vice President Sara Duterte na tanggapon an nagkapirang documentary evidence kan House prosecution, maliban sa 845 acknowledgment receipts na poon kan Disyembre 21 hasta 31, taong 2022, na saindang pigtutulan.
Dai man natanggap kan depensa an ikalimang proposed stipulation kan prosekusyon, kun sain nakalaag na naresibe kan Office of the Vice President (OVP) an confidential funds na nagkakantidad nin P125 milyon kan Disyembre 20, 2022, na ginastos sa laog sana nin 11 aldaw.
Pinasalamatan man ni Atty. Kapunan an defense counsel sa pag-stipulate kan nagkapirang marked evidences.
Sinegundahan man ni Trial Presiding Office Francis “Chiz” Escudero na pasalamatan an mag-ibong na kampo sa pagtabang sa korte asin pagpapahalipot kan oras sa paglilitis.
Segun kay Atty. Kapunan, nasa kabilugang 10 kahon o 2/3 kan kabilugang 15 kahon an nabawas sa mga ebidensiya.
