LEGAZPI CITY—Naghahanda na ngunyan an lokal na gobierno kan Camalig, Albay sa pag-decamp kan mga evacuees kasunod kan nanutarang medyo pagbaba kan aktibidad kan Bulkang Mayon.
Segun ki Camalig Mayor Caloy Baldo, sa intrevista kan Bombo Radyo Legazpi, sa ibong kaini naghahalat man liwat sinda kan abiso kan Philippine Institute of Volcanology and Seismology.
Nasa pitong bulan nang nagtitinir an mga nag-ebakwar na residentes sa saindang mga evacuation centers.
Plano man kan LGU na matawan nin food packs an mga residentes en kaso madagos na an pag-decamp; siring man an pakikpagkoordinar sa Department of Social Welfare and Development para sa financial assistance magin sa Department of Labor and Employment (DOLE) para sa Tulong Panghanapbuhay sa Ating Disadvantaged/Displaced Workers.
Sienerto man kan alkalde sa mga evacuees na padagos an saindang koordinasyon sa Phivolcs nganing maaraman kun pwedesir na sindang i-decamp kun dagos nang magbaba an aktibidad kan nasabing bulkan.
