Maduon na pinahimutikan ni Philippine Coast Guard (PCG) spokesperson for the West Philippine Sea (WPS) Rear Admiral Jay Tarriela an mga akusasyon kan China na “infringement” o panghihimasok kan Navy personnel kan Pilipinas sa Ayungin shoal.
Ini an kasunod kan panibagong tensyon sa pagultangan kan mga tropa kan Pilipinas na nagmamando sa BRP Sierra Madre asin China Coast Guard kan Lunes, Hulyo 20.
Sa sarong pahayag ngunyan na Martes, Hulyo 21, ipigduon ni Tarriela na warang pigigibong pagbayolar o pagpaparibok an Pilipinas sa nangyaring madahas na engkwentro sa Ayungin Shoal.
Tinawan duon ni Tarriela na an mga tropang Pilipino an nasa laog kan sadiring teritoryo kaini, mantang an China Coast Guard (CCG) an naglakbay nin ginatos na mga milya ngani na magkawsa nin kariribukan sa katubigan kan Pilipinas.
Pigduon kan PCG official na an Ayungin an parte kan exclusive economic zone (EEZ) kan Pilipinas asin continental shelf salig sa 2016 Arbitral Award, na pinal asin igwang bisa sa irarom kan United Nations Convention on the Law of the Sea (UNCLOS) asin warang claim hali sa China kaibanan na an pig aapod na nine-dash line.
Ipighayag man ni Tarriela an tunay na pangyayari sa engkwentro kun sain sarong rigid hull inflatable boat na igwang lunad na walong katawo an idineploy kan China Coast Guard 21560 an nagrani sa BRP Sierra Madre asin nagsagibo nin bako otorisadong inspeksyon sa nasabing barko kan Philippine Navy.
Katakod kaini, nagdeploy angAFP personnel nin rubber boats ngani na itaboy an mga ini sa non-confrontational o mahinahong paagi alagad binaliwala kan CCG boat asin madahas na nanlaban.
Inapod man ni Tarriela na “barbaric” na Chinese crew member an nagbadol sa payo kan sarong suldadong Pilipino.
