LEGAZPI CITY- Ipinaliwanag kan Commission on Elections (COMELEC) na an mga rehistradong botante sa Naga City an madesisyon kun susuportaran an propuesto ngani na maging ganap na highly urbanized city an ciudad.
Ini an katakod kan pagpasiring ni Naga City Mayor Leni Robredo sa ahensya ngani na tukaron an pagsasagibo nin plebisito ngani na ganap na magin highly urbanized city an Naga City.
Segun ki Comelec Spokesperson Atty. Rex Laudiangco sa intrevista kan Bombo Radyo Legazpi na kinakaipuhan na makaresibe nin mayorya kan boto kan mga residente sa ciudad an nasabing propuesto.
Marurumduman na inaprubaran na kan komisyon an kahagadan kan lokal na gobierno na isabat an plebisito sa Barangay at Sangguniang Kabataan Elections (BSKE) na nakatalaan sa Nobyembre 2.
Huli digdi, madugang nin balota para sa ciudad asin nakatalaan man na isairarom sa training an mga paratukdo na magseserbi sa nasabing pirilian.
Paliwanag kan opisyal na mas makakatipid kun isasabay ini sa nasabing pirilian huli ta kun dae, posibleng gumastos nin nasa P50 million hasta P60 million.
Enkasong dagos na magin highly urbanized city, bibistuhon an ciudad bilang sarong mauswag na lugar asin suway sa provincia kan Camarines Sur.
