Nakatalaan nang desisyunan kan Sandiganbayan Second Division kun dagos na hahalion bilang co-accused si dating Department of Public Works and Highways (DPWH) Secretary Manuel Bonoan sa flood control case asin gibuhon na state witness sa kaso kontra ki Senador Jinggoy Estrada.
Ini makalihis makumpleto kan anti-graft court division an oral arguments.
Ipinaliwanag ni Second Division chairperson Geraldine Econg na igwang mga isyu na nangangaipo nin review ngani na masierto na tama an saindang posisyon.
Mawot man suboot nindang magtao nin kumpoletong resolusyon asin gumibo nin justification sa nabilog nindang desisyon.
Segun digdi, kun mapapatunayan kan korte na kaipuhan sunudon an pormal na proseso sa pag-abswelto o discharge process, kaipuhan tawan katwiran kan mga prosecutor an saindang lakdang.
Dapat man suboot na patunayan sa korte na kaipuhan an testimonya ni Bonoan asin bako siya “most guilty” sa mga imbwelto.
Sinabi man ni Econg na “for resolution” na an mosyon alagad dae ini nagtao nin eksaktong petsa kun nuarin mareresolbar.
Nag-ugat an lakdang kan Ombudsman na gibuhon na state witness si Bonoan kasunod kan pinirmahan na cooperation agreement para ma-secure an mahewas na kaaraman kan dating sekretaryo kan DPWH ngani na mapakusog an kaso kan prosekusyon.
