LEGAZPI CITY-Naka-standby na an mga food pack, evacuation center, rescue equipment asin emergency response teams sa bilog na National Capital Region (NCR0 bilang paghahanda sa epekto kan habagat na pinakusog pa kan Bagyong Inday.
Segun kay Metro Manila Council President asin San Juan City Mayor Francis Zamora, inatasan an gabos na lokal na gobierno na amay na ipuwesto an mga kinakaipuhang kagamitan, siertohon na nagagana an mga pumping station, asin ihanda an mga evacuation center, orog na sa mga lugar na pirmihang pigbabaha.
Pigenganyar man niya an mga residente sa flood-prone areas na mag-ebakwar nin amay asin dai na pag halaton pa an paglangkaw kan tubig ngani malikayan an peligro.
Mientras tanto., segun sa state weather bureau, pigaantisiparang mamatean an pinakamakusog na epekto kan habagat saaga, aldaw nin Biyernes asin Sabado.
Posible man na mag-anunsyo an mga lokal na gobierno nin suspensyon kan klase bago an pinagaantisiparang paglala kan raot nin panahon.
