LEGAZPI CITY-Magpapaluwas an Department of Energy (DOE) nin show-cause orders sa 175 na kompanya kan power generation sa nacion kun sain 164 sa mga on-grid area asin 11 sa mga off-grid area.
Ini ngani ipaliwanag an mga forced outages asin an saindang dai pagsunod sa mga kaipuhang report.
Segun kay DOE Secretary Sharon Garin na an 175 show-cause orders posibleng enot na batch pa sana, kun sain sarong accountability review an isasagibo sakop an Marso 2025 hasta Marso 2026.
Posible man na mahampang sa padusa o magin pagbawi kan mga lisensya an mga ini depende sa gabat kan bayolasyon.
Kasunod ini kan paglaag kan yellow alert status sa Visayas grid, na nangangahulugang an operating margin bako bastante ngani matugunan an contingency requirement kan transmission grid sa laog kan magkakasunod na aldaw huli sa pagkawara kan nagkapirang planta poon pa kan 2021.
Segun man kay Gabriel Corpuz, legal officer kan DOE Renewable Energy Management Bureau, nasa 60 hasta 80 sa mga kumpanya, iyo an nasa Luzon mantang dai mababa sa 20 sa Visayas asin 40 sa Mindanao.
Sinabi kaini na kadaklan digdi, nagbayolar sa mga forced outages, haloy na deratings, asin pagkabogo na makapaghatod nin mga committed capacities.
Kaipuhan man magsumiter kan mga kumpanya nin mga self-assessment form, asin action plan enkaso maikonsiderang kulang sinda sa suplay.
