LEGAZPI CITY-Nagkasundo an Iran asin Estados Unidos na punduhon an nakaaging sigalot sa gulf asin ipadagos an diyalogo mapadapit sa saindang alitan sa Strait of Hormuz, susog sa nagkapirang report.
An lakdang na ini, nahilingan na matapos sa palitan kan mga pag-atake na nagpatanid sa saindang interim peace agreement.
Segun sa sarong senior US official, plano kan mag-ibong na kampo na magmiting sa Hunyo 30, sa Qatar.
Alagad, wara pang opisyal na pahayag an White House mapadapit digdi.
An pagbabalik kan diplomasiya kasunod kan pirang aldaw na palitan nin airstrikes sa pagultanan kan duwang nacion.
Nagpoon an tensyon kan Huwebes kan tamaan kan Iranian projectile an sarong cargo vessel sa Strait of Hormuz.
Nagbasol man parehas an Estados Unidos asin Iran sa kun sisay an nagbayolar sa interim ceasefire na saindang napagkasunduan kan Hunyo 17.
Kan nakaaging semana, naglansar an Iran nin mga missile asin drone sa mga military site kan Estados Unidos sa Kuwait asin Bahrain.
Nangyari ini makalihis an patanid ni US President Donald Trump na pababagsakon an liderato kan Iran kun dai kaini susunudon an kasunduan ngani punduhon na an gera.
