Ipagpapadagos an paglilitis kan impeachment court kontra ki Vice President Sara Duterte sa Hulyo 6 sa ibong kan isyu katakod kan selyadong kahon nin mga dokumento hali sa Bureau of Internal Revenue.
Segun ki Senate Secretary asin impeachment court clerk Atty. Renato Bantug Jr., warang rason ngani na maapektaran kan nasabing isyu an ipigtalaan na pagpupuon kan trial.
An selyadong kahon an naglalaog kan mga income tax return ni Vice President Sara asin agom na si Atty. Manases Carpio.
Nagluwas an isyu makalihis hagadon kan House prosecution panel sa isinagibong pre-trial conference na buksan asin markahan an kahon bilang parte kan saindang mga ebidensya.
Mientras tanto, nakatalaan na ipaluwas sa Hunyo 29 an pre-trial order kan impeachment court.
Nakalaag digdi an napagkasunduan kan prosekusyon asin depensa, kaibanan an mga facts na pinagsusuwayan, listahan kan mga testigo asin schedule kan paglilitis.
