Uminabot sa 10 metriko toneladang tilapia an nagadan sa mga fish pen sa Magat Dam sa Isabela huli sa fish kill.
Napag-araman na uminabot sa labi sa P1 million an kantidad kan nalugi sa mga operator asin nag-aataman nin tilapia sa lugar.
Basado sa Bureau of Fisheries and Aquatic Resources o BFAR-Isabela, kawsa kan pagkagadan kan mga sira an pagbaba kan antas kan dubig sa dam asin kakulangan nin oxygen.
Nasa 10 metric tons nin tilapia an nairehistrong nagadan hali sa mga fish pen sa mga banwaan kan Ramon asin Cordon, na katumbas nin pigkakarkulong P1.2 million an kantidad kan nalugi sa mga operator.
Nagpuon na makaresibe an BFAR nin mga report nin fish kill kan Lunes kaya tulos na pinayuhan an mga operator na mag-ani kan saindang mga sira ngani na maibitaran an mas dakulang danyos.
Siring man, igwang nagkapirang operator an dae na naisalbar an saindang mga ataman.
Mientras tanto, nagpromesa man an Isabela Provincial Fishery Office nin tabang sa mga naapektaran na fish pen operators, kaibanan an pagtatao nin libreng fingerlings ngani na liwat sindang makapagpuon.
