LEGAZPI CITY—Idinonar kan mga estudyante gikan sa Veritas College of Irosin an saindang ginibong bamboo coffin sa sarong pamilya na nawaran nin padangat sa buhay asin warang kakayahan na magbakal nin regular na klase nin kabaong sa provincia nin Sorsogon.
Nanggana man an nasabing bamboo coffin ‘Best Feasibility Study’ sa saindang eskwelahan.
Segun ki Francia Fortes saro sa mga estudyante, sa intrevista kan Bombo Radyo Legazpi, nagpuon ini sa pinaka-requirement kan saindang paratukdo na magin innovative durante kan pag-defense kaya nag-isip asin napagkasunduan kan saindang grupo na bamboo coffin an magin feasibility study.
Dugang pa niya na basado sa saindang pagsaliksik, wara pa sindang nahiling na nakakagibo kaini bako sana sa saindang eskwelahan kundi magin sa Pilipinas.
Dae man sinda nadifisilan maghanap nin kawayan huli sa kadakol kaini sa saindang lugar alagad saro sa saindang kinahampang na kadifisilan an pagputol-putol kaini na ikinairido kan saindang kamot.
Sinabi man kaini na an ginibong bamboo coffin an idinonar sa less fortunate na pamilya na nawaran nin padangat sa buhay sa lugar.
Dugang ni Edrian Barrenechea saro man sa mga researcher na may nagtabang na artist nganing madisensyuhan an saindang ginibong bamboo coffin.
Tinawan-doon man ninda na an obheto kan grupo an makatabang sa mga less fortunate na mga pamilya nganing dae masayang ini; mabisto sinda sa market urog na makatabang sa mga bako masyado kaya magbakal nin regular na klase nin kabaong.
Mientrastanto, bukas man an grupo sa partnership asin investor alagad sa ngunyan naghahanap sinda nin pwedesir na makatabang nganing mai-patent an saindang ginibo nganing marekognisar an saindang inagihang kadifisilan bako sana sa social media kundi magin sa legal na lakdang.
