LEGAZPI CITY-Posibleng maapektaran an mga mediators o tagapamagitan kan peace deal kan Estados Unidos asin Iran an liwat na pagsasarado kan Strait of Hormuz.
Huli suboot ini sa posibleng dai pagtatapos kan nai-report na kasunduan kun sain laoman na liwat na masiklab an tensyon na pwedisir magresulta sa pagsasarado kan Strait of Hormuz.
Segun kay Bicol University Peace Studies Professor Dr. Herbert Rosana, sa intrevista kan Bombo Radyo Legazpi na para saiya bako pa ini agreement kundi sarong memorandum of understanding (MOU) kun sain nagkasundo sinda para sa 60 days ceasefire asin negosasyon.
Dugang pa niya na sa laog kan 60 days na ini, nagkasundo an Iran asin US na bubuksan an Strait of Hormuz asin pupunduhon an mga pag-atake.
Posibleng magin paagi suboot ini ngani makapag-olay asin makapag-negosasyon sinda huli ta igwang domestic issue an duwang nacion.
Sinabi pa kan opisyal, na nauli sinda sa negosasyon huli ta gipit na an Iran pagabot sa saindang ekonomiya, siring man an US na dagos an pagmahal kan barakalon o inflation.
Posible man suboot na mag-fall out ini sa pulitika na makakaapektar sa candidate kan republican party kun kaya nagkasundo sinda.
Alagad dai man nagin matrayumpo an saindang negosasyon sa Switzerland na posibleng makaapekto man sa kredibilidad kan mga negotiators.
Dagdag pa kan Propesor na dakulang factor man ini mga negotiators huli sa problema ninda sa komunikasyon, rason kan saindang saradong perspektibo.
Kinakaipuhan suboot digdi an pagigin honesto ninda alagad difisil ini huli ta hararom an nagin disagreement kan duwang nabanggit na nacion.
