LEGAZPI CITY—Arestado an sarong pulis na may ranggong police major sa ginibong entrapment operation kan mga otoridad sa Camp BGen Simeon A. Ola, Brgy. 1, Em’s Barrio, Legazpi City.
Segun ki Legazpi City Police Station Chief of Police Police Lieutenant Colonel Arthur Tagtag Jr., sa intrevista kan Bombo Radyo Legazpi, kinundusir an operasyon kan pinagsarong operatiba kan Regional Intelligence Unit 5, Regional Intelligence Division (RID) Tracker Team, asin Legazpi City Police Station makalihis suboot na maghagad nin kwarta karibay kan pagpasa kan medical phase kan nagpapadagos na recruitment process kan kapulisan sa Polioce Regional Office 5.
Segun sa hepe posible suboot na ginibo an extortion huli sa pagpromesa sa pig-recruit na makakalaog sinda sa PNP.
Posible man na maabot sa labi P50,000 an pighahagad kan suspek; siring man nakua digdi an P39,000 na boodle money asin sarong genuine P1000 bill.
Dugang ni Tagtag na posibleng mahampang an suspek sa kasong extortion asin pwedesir man ining sunadan nin kaso kan saiyang unit nin administrative case.
Mahigot man na pigpagiromdoman kan opisyal an mga PNP recruits urog na sa PRO 5 na dae pigkunsinti an mga siring na aktibidad mapadapit sa saindang pag-recruit, huli sa mawot man ninda an patas na proseso nganing makapagprodusir nin pulis na may kalidad na magserbi sa publiko.
