LEGAZPI CITY-Posibleng mawaran nin hasta P8 Bilyon an mga lokal na paraooman nin Mais, mantang pigkokonsidera kan gobierno an pagpapalawig kan import quota, susog sa sarong grupo nin paraooma.
Segun kay Federation of Free Farmers National Manager Raul Montemayor, sa intrevista kan Bombo Radyo Legazpi na balak doblehon o labi pa sa 500,000 tons an minimum access volume kaini na igwang 5% sanang taripa imbes na dating 214,000 tons asin 5% na taripa.
Paliwanag ni Montemayor na kun mangyari ini, mas kadakol na Mais an mailalaog sa nacion sa mas hababang taripa.
Pigkakahaditan ninda na makaapektar ini sa presyo kan Mais asin posibleng mameligro an mga paraooma.
Sinabi pa niya na an minimum access volume, sarong kantidad kan Mais na pwedisir angkaton sa mas hababang taripa.
Dugang pa kaini na kun mababa an taripa sa 5%, bale an imported na Mais, mabarato nin haros P2 kada kilo.
Huli digdi, kaipuhan suboot na pantayan ini kan lokal na Mais sa mas hababang presyo.
Sa sarong taon, nagpo-produsir nin 8-Milyon tons o katumbas nin 8-Bilyon kilos nin local na Mais an satuyang nacion.
Huli digdi, kun ipapagpalagay suboot na piso na sana an bagsak kan presyo huli sa dagdag na minimum access volume, posibleng maging P8-Bilyon an mawawarang ganansya kan mga paraooma.
Alagad, sa presente pinago-olayan pa an mga guidelines kaini asin may agam agam sinda kun ipapadagos an nabanggit na lakdang.
