LEGAZPI CITY-Pigkokonsiderang pangenot na paghahanda para sa 2028 polls kan mga pulitiko an Barangay and Sangguniang Kabataan Elections (BSKE) sa maabot na Nobyembre.
Huli digdi, pigpapagirumduman kan sarong election watchdog an publiko mapadapit sa mangyayaring botohan.
Segun kay Kontra Daya Convenor Prof. Danilo Arao, sa ekslusibong intrevista kan Bombo Radyo Legazpi na kaipuhan tutukan na dai magamit an BSKE para sa intrese kan nagkapira.
Dugang pa ni Arao na an BSKE ngonian, igwang nang anti-dynasty provision.
Problema sana suboot an pagpapalawig kan termino nin tulo hasta apat na taon, na dapat siertuhon na dai aabusuhon asin gagamiton kan mga miembro kan kongreso asin senado para sa magpalawig kan saindang termino.
Tinawan doon pa niya na dapat masierto na an matukaw sa posisyon, dai magpapagamit sa mga nasa kapangyarihan.
Sinabi pa kan opisyal na igwang epekto an nangyayari ngonian sa politika sa Pilipinas sa papaabot na BSKE huli ta sa kampanya naglalaom an kun gurano kakusog an voter base.
Dagdag pa niya na “crucial” an pagpapakusog kan voter base, huli ta naglalaom sinda sa mga nakatukaw sa barangay level huli ta sinda an nakakapag-mobilize sa mga komunidad.
Mensahe niya na dapat siertuhon na an mga barangay leaders, siertong magtatrabaho para sa interes kan mga residente, matino asin warang bahid nin kurapsyon.
