LEGAZPI CITY-Ipinaapod ni President Ferdinand R. Marcos Jr. an Kongreso kan Pilipinas para sa sarong special na sesyon sa Hunyo 17, 2026 ngani pag-olayan an nagkapirang prayoridad na propwestong ley na obhetong pakusugon an social protection asin itaas an kalidad kan buhay kan mga Pilipino.
Sa paagi kan Proclamation No. 1318, sinabing kaiba sa mga pago-olayan sa sesyon an pagtatatag kan National Center for Geriatric Health, mga amendment sa Government Assistance to Students and Teachers in Private Education (GASTPE) Act, Assisstance to Individuals in Crisis Situations (AICS) Act, asin mga amendment sa Universal Access to Quality Tertiary Education Act (UAQTEA).
Kaiba man sa mga agenda an: Last Mile and Geographically Isolated and Disadvantaged and Conflict‑Affected Areas (GIDA)Schools Act, mga amendment sa Masustansyang Pagkain Para sa Batang Pilipino Act, Anti‑Political Dynasty Law, asin an Presidential Merit Scholarship Program.
Susog sa proklamasyon, obheto kan sesyon na maparikas an pagpasar kan mga ley na magtatao nin tabang sa mga sektor kan edukasyon, salud, asin kabuhayan.
Afuera digdi, ipinapa-apod man an Commission on Appointments ngani pag-olayan an mga bagong appointment sa gabinete, militar, asin foreign service, susog sa Konstitusyon asin nagi-iral na mga ley.
An Proclamation No. 1318, pinirmahan ni President Marcos ngonian na aldaw sa ciudad kan Maynila, bilang tugon sa pangangaipo sa makaskas na mga repormang panlipunan bago an pagtatapos kan enot na kwarter kan taon.
