LEGAZPI CITY—Arestado an sarong lalaking pigtutubudang tulak nin ilegal na droga sa ginibong buy-bust operation sa banwaan kan Libon, Albay.
Binisto an suspek na si alyas “Rico”, residente kan nasabing banwaan asin kabale sa pigkonsiderar na street-level individual.
Naarestar ini makalihis magpabakal nin sarong pakete nin pigtutubudang shabu sa sarong poseur-buyer karibay kan P500 marked money.
Nakumpiskar pa saiya an tulong kadugangang pakete nin pigtutubudang shabu, sarong digital weighing scale, sling bag, asin pirang barya.
Pigkarkulong maabot sa kabilogang 4.12 gramo nin pigtutubudang shabu an nakumpiskar na may kantidad na labi P28,016.
Kinunudusir an operasyon kan mga personahes kan Libon Municipal Police Station Municipal Drug Enforcement Unit asin Philippine Drug Enforcement Agency (PDEA) Region 5.
Sa presente nasa kustodiya na kan Libon MPS an suspek para sa magkakanigong disposisyon.
