LEGAZPI CITY- Nagpaliwanag an opisyal kan Barangay Mi-si sa banwaan kan Daraga, Albay dapit sa cash assistance na ipigtatao para sa mga paraoma na apektado kan nagpapadagos na aktibidad kan bulkang Mayon.
Ini makalihis an agrangay kan nagkapira na dae sinda kasabay sa listahan kan mga nakaresibe asin makakaresibe kan P10,200 na cash assistance.
Segun ki Kagawad Servando Loria sa intrevista kan Bombo Radyo Legazpi na dakol na mga paraoma an bako miyembro kan mga farmers association asin bako rehistrado.
Sinabi kan opisyal na bako an barangay an naglilista kan mga paraoma para sa ayuda.
Pigduon kaini na puon pa kan 2023, padagos na an saindang pag-enganyar sa mga paraoma na magparehistro alagad hasta sa ngunyan an dakol man liwat an dae nagsusunod, kaya warang rason an mga ini ngani na maghinanakit huli ta dae man sinda nagkukulang sa pagirumdom.
Katunayan, naghaharong-harong pa suboot an barangay ngani na makipag olay na mag-atendir sa meeting an mga paraoma alagad dakol an nagmamatagas.
Segun ki Loria na bukas an Upland Farmers Association para sa gabos na mga mawot magparehistro.
