LEGAZPI CITY—Katakod kan pagkomemorar kan International Nurses Day, pangapudan man liwat ngunyan kan mga grupo nin nurse an mahalangkawan an saindang sweldo asin maresibe an magkakanigong benepisyo sa tahaw kan tindi kan pangangaipuhan asin presenteng sitwasyon.
Segun ki Filipino Nurses United President Jocelyn Andamo, sa intrevista kan Bombo Radyo Legazpi, nakatalaan giraray sindang magsunad sa Lower House nin sarong propwesto na gibohong P50,000 an entry level na sweldo para sa mga nurse na nasa pribado asin pampublikong sektor.
Pagdoon niya na dapat halangkawan an sweldo kan mga nurses huli sa deserve ninda ini kawsa kan dakulang papel asin kontribusyon sa salud kan namamanwaan magin an sakripisyo ninda huli sa gabat kan saindang responsibilidad bilang mga nurses.
Dugang niya dapat tawan nin importansya asin atensyon an saindang pangapudan huli sa dakol na nurse an napipiritang magluwas kan Pilipinas dara kan dae nareresolbaran an problema sa hibabang sweldo sa nacion.
Segun pa ki Andamo na an kakulangan sa nurses sa nacion an maresulta sa mas dakol na magkakahelang na tawo huli sa dae malilikayan ini asin dae namamantinir an saindang salud.
Tinawan-doon kaini na dapat may bastanteng pondo an gobierno sa public health care nganing masierto na matawan nin nakabubuhay na sweldo an mga personnel asin maengganyar na magtinir sa nacion.
Nangapudan man ini sa administrasyong Marcos na maitob na an saiyang promesa an langkawan an sweldo kan saindang sektor huli sa kayang-kaya man suboot ining dugangang kunmay political will, urog na dapat tagamahan nin pondo an public health.
