Ipigsugo ni Presidente Ferdinand Marcos Jr. sa mga ahensya kan gobierno na tulos na tabangan an mga komunidad na naapektaran kan ashfall hale sa Bulkang Mayon, partikular sa mga banwaan kan Guinobatan asin Camalig sa provincia kan Albay.
Susog sa Presidential Communications Office (PCO), puspusan na ang ipigsagibong response operations kan gobierno nganing maprotehiran an salud kan publiko, masierto an kaligtasan kan mga residente, asin mamantenir na bukas an mga tinampo asin importanteng serbisyo sa mga apektadong lugar.
Nangenot an Department of Public Works and Highways sa clearing operations nganing tanggalon an mahibog na abo sa mga pangenot na tinampo asin masierto an ligtas na pagbiyahe kan mga residente asin emergency responders.
Mantang nagbarewas man an Department of Social Welfare and Development (DSWD) sa mga pamilyang nasa evacuation centers. Kabale digdi an rinibong food packs, ready-to-eat meals, asin iba pang relief supplies na naka-preposition sa bilog na Bicol Region.
Nagdeploy man an Department of Health (DOH) nin N95 masks, mobile clinics, asin water stations nganing simbagan an mga problemang pangsalud siring kan abo, dipisil sa paghangos, asin iritasyon sa mata kawsa kan ashfall.
Sa tabang man kan Department of the Interior and Local Government (DILG), ipinakalat an Bureau of Fire Protection (BFP) para sa water spraying asin paglinig nin abo sa mga komunidad.
Pinangenotan kan Office of Civil Defense (OCD) asin kan National Disaster Risk Reduction and Management Council (NDRRMC) ang mahigot na pagpapaotob nin evacuation asin padagos na monitoring sa mga high-risk area.
