LEGAZPI CITY-Nagsiklab an duwang kasulo sa kabuludan kan Iwate Prefecture, sa Kozuchi district, Otsuchi sa Japan.
Nagpoon pa ini kan Miyerkules, kun sain nag-abot na sa 1,176 ektarya an hewas kan kasulo sagkod kan Biyernes.
Pig-ebakwar na an labi sa 1,000 na mga residente huli sa insidente.
Marikas ining nagkalat asin naapektaran an nagkapirang edipisyo pati na an mga kataning na kabuludan.
Pirang oras bago matapos an kasulo sa nabanggit na lugar, saro pang kasulo an nagsiklab sa parte naman kan Kirikiri district, kun saen humigit-kumulang 10 kilometro an rayo kaini.
Huli sa peligro kan insidente, pinayuhan kan lokal na gobierno kan Japan an mga residente hale sa 566 na kaharongan na mag-ebakwar, partikular na an mga nakatenir harani sa nabanggit na lugar.
Mientras tanto, warang pang nairerehistrong nagadan o nairido sa insidente.
Naenot na man na nagpatanid an weather observatory sa lugar mapadapit sa makukusog na paros, na posibleng magpalala sa pagkalat kan kasulo.
