LEGAZPI CITY—Pighayag kan Philippine Institute of Volcanology and Seismology na dakula an epekto kan pagigin bako operational kan station sa pag-monitor nin bulkan makalihis na habonon kan dae pa nabibistong persona an mga kable sa PHIVOLCS Ligao Observation Station sa Ligao City.
Segun ki PHIVOLCS Volcano Monitoring and Eruption Prediction Division Chief Mariton Bornas, sa intrevista kan Bombo Radyo Legazpi, na mantang sadit na gamit an nawara, an dakula man na kantidad nin datos an nawara na dapat kutang nakokolektar kan station.
Dae man suboot ninda mahahanap an lokasyon en kaso man na magkaigwa nin dakol na earthquake sa Bulkang Mayon urog na sa ngunyan na nasa Alert Level 3 ini.
Tinawan-doon ni Bornas na dakula an epekto kan pagkawara kan ibang ekipahe sa station huli sa nagkukulang an datos asin naaapektaran an accuracy kaini.
Mientrastanto, abiso man ni Bornas sa namamanwaan na pangatamanan an mga monitoring stations na nakapalibot sa bulkang Mayon huli sa ini an nagtataong impromasyon mapadapit sa estado kaini.
