Sienerto kan Armed Forces of the Philippines (AFP) ang pagpapadagos kan pagsuporta asin pagprotehir sa mga parasisira sa West Philippine Sea sa ibong kan presenteng Balikatan Exercises.
Segun ki PH Navy Spokesperson for the WPS, Rear Admiral Roy Vincent Trinidad, nagtitinir an suporta kan AFP sa mga parasisira sa pinag-aagawang kadagatan, sa tabang kan mga suldados na bako parte kan mahewasang joint military drill.
Kompwesto ini nin regular na pagbabantay sa mga maritime feature kan Pilipinas siring kan Ayungin Shoal na saro sa kalimitang pigbibisita kan mga parasisirang Pilipino, sagkod sa Bajo de Masinloc sa kadagatan kan Zambales.
Pagsierto kan Navy official, sa ibong kan rinibong suldados na Pilipino na nakikisumaro sa taunang military simulation an may bastante man liwat na nakadeploy sa mga regular military asin naval bases sa manlaen-laeng nacion.
Kun babalikan, regular ang presensiya kan Chinese vessels sa WPS mantang naenot na man na tinuyaw kan China ang Balikatan sa pagultangan kan US, Pilipinas, Japan asin iba pang kalahok na nacion.
Saro sa mga masirbing venue kan pirang military simulation na nakapalaog sa Balikatan an kadagatang sakop kan Exclusive Economic Zone (EEZ) kan Pilipinas sa WPS harani sa probinsya kan Palawan.
