Tahasang naghugas-kamay si dating House Speaker Martin Romualdez laban sa mga alegasyon nin iregularidad sa national budget para sa flood control projects, asin ipigdoon na an korapsyon an nangyayari sa implementasyon kan mga ahensya asin bako sa proseso nin paggibo nin ley sa Kongreso.
Segun ki Romualdez, an pagpasar kan national budget an produkto kan halawig na proseso gikan sa Ehekutibo, Kamara, asin Senado.
Ipigdoon niya na an mga mambabatas an warang kinaaraman sa procurement, inspeksyon, asin aktuwal na pagtugdok nin imprastraktura.
Idinagdag kan dating lider kan Kamara na bako siya parte kan bicameral conference committee o kan small committee na nag-draft kan pinal na porma kan budget sa likod kan mga saradong pinto.
Imbes na mag-ako nin responsibilidad, itinukdo ni Romualdez an duwang opisyal na suboot may direktang kontrol sa mga desisyon sa pondo.
Nganing patunayan an saiyang pagkainosente bilang mastermind kan nasabing anomalya, pig-agyat ni Romualdez an publiko na siyasaton an mga proyekto sa sadiri niyang distrito sa Tacloban.
Pigtugutan niya an saiyang mga personahes na iluwas an listahan kan gabos na proyekto sa saiyang hurisdiksyon para sa pagsiyasat kan publiko.
Saiyang piglinaw na an tunay na command responsibility sa implementasyon kan mga proyekto an yaon sa Executive branch, partikularmente sa Department of Public Works and Highways (DPWH), asin bako sa sarong collegial legislative body arog kan Kamara asin Senado.
