LEGAZPI CITY – Dae makapanubod an sarong Bicolano topnotcher sa kakatapos pa sanang April 2026 Midwives Licensure Examination makalihis maguno kaini an primerong pwesto.
Segun ki Roi Zedrick Follosco Belen na tubong Nabua, Camarines Sur sa intrevista kan Bombo Radyo Legazpi na piglaoman niya nang makakapasar siya sa naunambitang eksaminasyon alagad dae niya pighuna na siya pa an mangengenot sa mga topnotcher.
Dae niya man suboot ma-eksplikar an kaugmahan na saiyang namamatean sa presente asin labi an saiyang pasasalamat sa nagunong trayumpo urog nang nakamate siya nin anxiety mantang pighahalat an resulta.
Pighistorya niya man an saiyang pinag-agihan kun sain tulos siyang naghingoa sa pagself review pirang bulan an nakaagi makalihis man siyang makapasar sa Nursing Licensure Examination.
Dugang pa kan naunambitang topnotcher na na-enganyar siyang magtake sa Midwives Licensure Examination huli ta igwa sindang sadiring lying-in clinic siring man an impluwensya kan saiyang magurang na saro man na midwife.
Nagin inspirasyon niya man sa pagguno kan trayumpo an sakripisyo kan saiyang mga magurang asin an pagtatao niya nin tyansa sa ibang tawo na punan an saindang buhay sa paagi kan pagtabang sa sainda na mamundag sa kinaban.
Abiso man ni Belen sa mga estudyante, graduates, asin retakers na permihang magpangadyi asin dae mawaran nin paglaom huli ta dae pa tapos an saindang journey nganing ma-otob an saindang mga pangaturugan sa buhay.
